Beste Tuurhouters en Tuurhouterinnekes,
Eindelik maog ’t gezag waere: Ich ben de Prins van de Tuurhouters veur ’t kommende sezoen. Lang nao oetgekeke en get langer gewach dan gepland. Noe d’r ein nuujt daak op ‘t Tuurhoes lik is ’t aan mich, samen mit Jeugprins Kjell en Jeugprinses Lola, om ens te testen wie good dat noe eigelik vas lik.
Geer kent mich mesjien es besjtuurslid van J.V. ’t Waeske en woovan ’t lètste jaor es veurzitter. Wiejer zörg ich es TD-er bie KVW L.E.G. dat de kenjer sjpelkes kènne doon en de papa’s op de vriedigaovend in de wei ein glaas beer kènne drenke. Op zunjigmörge ben ich te venje es bugelsjpeler bie fanfare St. Caecilia Göttkaove en op woonsdig bie de jeugfanfaar. Es ich dan nog tied euver höb, ben ich bezig mit sjtudere. Ich zit noe in ’t lètste jaor van de bachelor “Systeem en Netwerkbeheer” bie hoagesjoal PXL in Hasselt. De vastelaovend is mich mit de paplaepel ingegaeve, maarja wat wil se oug mit zo’ne pap. Hae waor zelf in 1991 Prins van de Tuurhouters en noe maog ich ‘t 3×11 jaor later oug mitmake. Oug aan mam heure kèntj zeen ze neet vies van de vastelaovend. Zie waor in 1991 de Prinses van pap en opa is in 1961 Prins gewaes van de Smautbuule in Einekoeze. Zelf ben ich in 2007 Jeugprins gewaes en is mien zöster in 2011 Jeugprinses gewaes. Ich weit zeker dat veer d’r mit òs drieje eine sjoane vastelaovend van gaon make en haop ug allemaol te zeen in ’t Tuurhoes, loupend in d’n optoch of langs de kèntj van de route.